雪豹

雪豹（學名：Panthera uncia）係一種大型貓科食肉動物同旗艦種，由於佢哋喺雪線附近同雪地之間活動，所以叫「雪豹」。雪豹原產於亞洲中部山區，中國嘅天山等高海拔山地係雪豹嘅主要分佈地。

因為佢處於高原生態食物鏈嘅頂端，雪豹亦俾人叫做「高海拔生態系統健唔健康嘅氣壓計」。而由於非法捕獵等多種人為因素，雪豹嘅數量正急劇減少，現已成為瀕危物種。喺中國，雪豹嘅數量甚至少過大熊貓。「只見雪豹皮，唔見雪豹」係1990年代，美國博物學家佐治·夏勒博士嘅痛心吶喊。

生物學

形態特徵

雪豹有好多喺寒冷嘅山區生長嘅生物特徵，佢哋身體粗壯、毛厚而濃密、耳細，呢啲特徵都有助減少身體熱量散發。雪豹喺大型貓科動物中屬於中等體型，大細似豹，頭細過豹。平均體重30到50公斤，身長100到130厘米。皮毛係灰白色，下腹部嘅毛係白色嘅，皮毛上有黑色點斑同埋黑環。佢相對長而粗大嘅尾（大概係身長嘅3/4）成為同其他相似物種區分嘅明顯特徵。呢條長尾巴生滿濃密蓬鬆嘅毛，分佈有斑紋，尾尖可以繞成圓形花結，堅硬嗰時好似鋼鞭豎起。除咗喺山地環境攀爬斜坡同埋快速奔跑嘅時候幫助雪豹來保持平衡外，喺寒冷嘅環境中，呢條尾亦可以喺佢睏覺嗰時冚住口鼻保溫。有嘅個體由於條尾巴太過粗大，養成咗盤尾嘅習慣，形成一個捲曲嘅圓圈。雪豹嘅眼虹膜呈黃綠色，強光照射下會縮為圓狀。同另一種貓科動物猞猁類似，雪豹亦有大而披住毛嘅腳，前腳5趾，後腳4趾，前腳比後腳闊大。大腳嘅作用有如雪地靴，可以分散體重喺雪地上嘅壓力，唔會喺鬆軟嘅積雪上陷得太深，有助於喺雪地行。腳掌嘅毛除咗可以增加喺陡峭或唔穩定雪面嘅摩擦力之外，重可以減少體熱由腳掌散失。趾端有尖銳嘅角質化硬爪。雪豹沿脊背有三條由黑斑形成嘅線紋直到條尾巴嘅根部，後面嘅黑環邊較闊而大，至尾巴端最為明顯，如同植物嘅葉子，所以有「艾葉豹」嘅俗稱。

演化同分類

雪豹喺生物分類學上嘅定位，曾經係單獨嘅一個屬——雪豹屬（Uncia），種名係「Uncia uncia」（John Edward Gray, 1854）。然而最近嘅分子生物研究顯示呢個物種應該係豹屬嘅一個亞屬，佢最近嘅親戚係虎。

雪豹嘅頭骨

解剖特徵

雪豹嘅頭骨同豹相似，但略短於豹。顴弓發達。鼻骨短而闊，吻部、額骨同埋眶間距亦闊。上頜骨​​額突出部超過鼻骨嘅額突部。人字嵴、矢狀嵴特別隆起，骨縫癒合緊密。鼓室唔多發達，聽泡較平低。下頜骨厚實、底緣平直。

牙齒齒式係${\frac {3\cdot 1\cdot 2\cdot 1}{3\cdot 1\cdot 2\cdot 1}}=30$。上、下齒均較細，排一橫列。犬齒特別發達，長略彎，呈圓錐狀，齒尖銳利，犬齒同前臼齒趾間距離較細。第二前臼齒較細。 上臼齒形細，橫列。

遺傳特徵

雪豹嘅常染色體係32（M+SM） + 4（A），X、Y性染色體都係亞中著絲粒染色體（SM）。